प्रचण्डको अभिव्यक्तिप्रति एमालेको भर्त्सना, माफी माग्नु पर्ने भनाइ

प्रधानमन्त्री केपी शर्मा ओलीको चीन भ्रमणलाई लिएर माओवादी केन्द्रका अध्यक्ष पप्रचण्डले भारतीय मिडियामा दिएको अभिव्यक्तिको एमालेले भर्त्सना गरेको छ । एमाले विदेश विभाग प्रमुख रघुवीर महासेठले शनिबार विज्ञप्ति जारी गर्दै प्रचण्डको अभिव्यक्तिको भर्त्सना गरेका हुन् ।

भारतीय मिडियासँगको अन्तर्वार्तामा प्रचण्डले प्रधानमन्त्री केपी शर्मा ओलीले ‘चिनियाँ कार्ड’ खेलेको बताएका थिए । प्रचण्डको यस्तो अभिव्यक्ति आधारहीन र गैरजिम्मेवार रहेको भन्दै एमालेले भर्त्सना गरेको हो ।

प्रचण्डको अभिव्यक्तिले नेपालको सार्भभौमसत्ता र परराष्ट्र नीतिमा समेत क्षति पुगेको महासेठले अंग्रेजी भाषामा जारी गरेको विज्ञप्तिमा उल्लेख गरेको छ । ‘प्रचण्डको अभिव्यक्तिले नेपालले नेपालको विकास र समृद्धिका अंग रहेका दुई छिमेकी भारत र चीनसँग राख्दै आएको सन्तुलनलाई नजरअन्दाज गरेको छ’, विज्ञप्तिमा भनिएको छ ।

मुलुकको सार्वभौमसत्ता र स्वतन्त्रताको रक्षामा प्रधानमन्त्री ओलीले ऐतिहासिक नेतृत्व गरेको पनि विज्ञप्तिमा दाबी गरिएको छ । एमालेले प्रचण्डलाई आफ्नो अभिव्यक्ति तत्काल फिर्ता लिएर नेपाली जनतासँग माफी माग्न भनेको छ ।