सामाजिक सञ्जाल विधेयकले नागरिकमा आतंक सिर्जना गरेको छ: नारायणकाजी श्रेष्ठ

नेकपा माओवादी केन्द्रका बरिष्ठ उपाध्यक्ष नारायणकाजी श्रेष्ठले सामाजिक सञ्जालसम्बन्धी विधेयकले नागरिकलाई आतंकित पारेको बताएका छन् ।

शुक्रबारबाट सुरु राष्ट्रियसभाको हिउँदे अधिवेशनलाई सम्बोधन गर्दै श्रेष्ठले सामाजिक सञ्जाललाई नियमन गर्न जरुरी भएपनि बोल्नै नपाउने गरि नियन्त्रण गर्न खोज्दा नागरिक आतंकित भएको बताएका हुन् । प्रस्तावित सामाजिक सञ्जालसम्बन्धी विधेयकले निरंकुशताको झल्को दिएको उनले बताउनुभयो ।

त्यस्तै श्रेष्ठले संविधानको सकारात्मक अन्तरबस्तुलाई प्रहार गर्ने आसयले संविधान संशोधन गर्न खोजिएको धारणा राख्नु भयो । सत्तारुढ दलका नेताहरुले नै दुईदलीय व्यवस्थाको पक्षमा खुलेर लागेको अवस्थामा देश निरंकुशतामा जान सक्ने संकेत देखिएको उनको भनाई छ ।

शान्ति प्रकृयाका बाँकी कामलाई निष्कर्षमा पुर्याउनका लागि सरकार गम्भीर नदेखिएको समेत उनले आरोप लगाउनु भयो । छिटो सिफारिस समिति गठन गरेर संक्रमणकालीन न्यायसँग सम्बन्धीत समितिलाई पूर्णता दिन उनले माग समेत गरेका छन् ।