राजतन्त्रका विषयमा संसदमा छलफल गर्न पाइदैन’ :रघुजी पन्त

काठमाडौं । नेकपा एमालेका सांसद रघुजी पन्तले संसदभित्र राजतन्त्रको विषयमा छलफल गर्न नपाइने धारणा व्यक्त गरेका छन् ।

आईतवार प्रतिनिधि सभाको बैठकमा बोल्दै पन्तले वर्तमान संविधानले गणतन्त्रलाई आत्मसाथ गरेकाले राजतन्त्र नचिन्ने बताउनु भयो । उनले समयको मागसँगै गणतन्त्रको स्थापना भइसकेकाले राजतन्त्रको विषय इतिहासमा सीमित भएको बताए ।

पन्तले समयको प्रवाहसँगै विश्वका राजतन्त्रहरु समाप्त भएर गणतन्त्र स्थापना भएको पनि बताए । उनले नेपालको इतिहासमा मल्ल, किरात, लिच्छवी वंश लगायतको राजतन्त्र भएको भन्दै अहिले पुनःस्थापनाका लागि किन शाह वंशको कुरा गरेको भन्दै प्रश्न गर्नुभयो ।

सांसद पन्तले जनभावना अनुसार अगाडि बढ्ने व्यवस्था नै लोकतन्त्र भएकाले सरकारले जनताको चासो र भावनालाई तत्काल सम्बोधन गर्नुपर्ने बताए ।