तीनकुने घटनामा पक्राउ परेका राप्रपा महामन्त्री धवल शमशेर राणा रिह गरिदै l

काठमाडौं । राप्रपा महामन्त्री धवलशमशेर राणालाई हाजिर जमानीमा रिहा गर्ने तयारी गरिएको छ । तीनकुनेमा भएको प्रदर्शनका क्रममा पक्राउ परेका राणालाई जिल्ला प्रहरी परिसर काठमाडौंको सिफारिसमा सरकारी वकिलको कार्यालयले छाड्ने भएको हो ।

स्रोतका अनुसार क्यान्सर पीडित राणालाई भारतमा नियमित उपचार तथा फलोअप आवश्यक पर्ने भएकाले उनीलाई हाजिर जमानीमा छाड्न लागिएको हो । राणाको प्रारम्भिक बयान सकिएको छ र अब मुद्दा प्रक्रियागत रूपमा अघि बढाइनेछ । तत्कालका लागि उनलाई अदालतमा उपस्थिति जनाउने सर्तमा रिहा गर्न लागिएको हो ।

गत चैत १५ गते काठमाडौंको तीनकुनेमा राजावादी समूहले आयोजना गरेको प्रदर्शन हिंसात्मक बनेपछि राणा सोही दिन पक्राउ परेका थिए । क्यान्सर उपचारबाट वञ्चित गराउन खोजिएको भन्दै संयुक्त जनआन्दोलन समितिले शुक्रबार आपत्ति जनाएको थियो ।