दार्चुलाको दुम्लिङमा सशस्त्र प्रहरीको बीओपी भवन शिलान्यास

दार्चुला- भारतसँग सीमा जोडिएको दार्चुलाको ब्यास गाउँपालिका–२ दुम्लिङमा सशस्त्र प्रहरीको बोर्डर आउट पोस्ट (बीओपी) भवनको शिलान्यास गरिएको छ । सशस्त्र प्रहरी नायब महानिरीक्षक कुमार न्यौपानेले भवनको शिलान्यास गरेका हुन् ।

जगदम्बा निर्माण सेवा प्रालिले ८९ लाख २८ हजार बढी लागतमा निर्माण गरिरहेको भवनमा जवान ब्यारेकसँगै सोकपिक, सेप्टिक ट्यांक तथा अन्य संरचना निर्माण गरिने बताइएको छ । बीओपी ब्यारेकमा ४ कोठा निर्माण गरिने छ ।

चालु आर्थिक वर्षभित्रै ब्यारेक भवनलगायत सम्पूर्ण संरचना निर्माण सक्ने गरी ठेक्का सम्झौता भएको दुम्लिङ बीओपी इन्चार्ज जयबहादुर महताले बताए । दुम्लिङ बीओपी अहिले भाडाको घरमा रहेको छ ।