शिवराज नगरपालिका १ सुरही पुल नजिकै वस दुर्घटना १०जनाको मृत्यु, ३० घाइते

बुटवल फागुन ३ । कपिलवस्तुको शिवराज नगरपालिका १ सुरही पुल नजिकै बस दुर्घटना हुदा १० जनाको मृत्यु भएको छ।

महेन्द्रनगर बाट काठमाडौका लागि यात्रु लिएर हिडेको सुनौलो महाकाली यातायातको रात्रीबसराती १ बजे दुर्घटना भएको जिल्ला प्रहरी कार्यालय कपिलवस्तुले जनाएको छ।

सुनौलो महाकाली यातायातले संचालन गरेको सु– प – प्र–०२–००१ ख ००९८ नम्बरको बस बाटोबाट २ सय मिटर तल खसेको हो।

दुर्घटनाबाट ३० जना घाइते भएको त्यसमध्ये ९ जनाको बुटवल रिफर गरिएको छ। अन्यको सन्जिवनी र आधारभूत अस्पतालमा उपचार भइरहेको कपिलवस्तु प्रहरी उपरीक्षक नवरत्न पौडेलले बताए।

मृतकको विवरण अझै आइसकेको छैन। मृत्यु हुनेहरुमा ७ पुरुष र ३ महिला भएकाे जिल्ला प्रहरी कार्यालय कपिलवस्तुका सुचना अधिकारी हरिवहादुर ओलीले बताए ।