विदेशीको आडमा राजावादी सक्रिय भएकाले प्रतिरोध गर्ने माओवादीको निर्णय

काठडमाडौं । प्रमुख प्रतिपक्षी दल नेकपा माओवादी केन्द्रले विदेशीको आडमा अहिले देशमा राजावादीहरु सक्रिय भएको निष्कर्ष निकालेको छ । गणतन्त्र, संघीयता, धर्मनिरपेक्षता, समावेशीता जस्ता संविधानका उपलव्धी जोगाउन माओवादीले पश्चगामी अभियानको प्रतिरोध गर्ने निर्णय पनि गरेको छ ।

पूर्वराजा ज्ञानेन्द्र शाहको स्वागतमा शनिवार भारत उत्तर प्रदेशका मुख्यमन्त्री आदित्यनाथ योगीको तस्बिर प्रयोगले गम्भीर अवस्था देखिएकाे समीक्षा गरेको हाे । सोमबार अध्यक्ष प्रचण्ड निवास खुमलटारमा बसेको पदाधिकारी बैठकमा पूर्वराजाको सक्रियता आफ्नै बलबुतामा नभई विदेशी शक्तिको आडमा प्रतिगामी शक्ति सलबलाएको विषयमा समीक्षा भएको महासचिव देव गुरुङले बताए ।

‘गणतन्त्रलाई कमजोर बनाउन प्रतिगमनकारी शक्ति सलबलाएको देखिन्छ । यो गम्भीर विषय हो । राजावादी प्रतिगामीको जुलुसमा आदित्यनाथको फोटो बोकेर हिँडेको छ । बाह्य शक्तिको उक्साहटमा पूर्वराजा सक्रिय भएको हुनसक्छ’, उनले भने, ‘राष्ट्रियतालाई कमजोर पार्न र माओवादीले लडेर ल्याएको व्यवस्था उल्टाउन देशी विदेशी शक्तिहरूले खेल्न खोजेको देखिन्छ । केपी ओली सरकारको जनविरोधी गतिविधिका कारण राष्ट्रियता थप सङ्कटमा परेको छ ।

अहिले नै गणतान्त्रिक व्यवस्था धरापमा परेको हामीले निष्कर्ष निकालेका छैनौँ । तर राष्ट्रियता, स्वाभिमानलाई बचाउन देशभक्त, वामपन्थी, गणतन्त्रवादी शक्तिहरू एक ठाउँमा आउनुको विकल्प छैन ।

’ माओवादीले गणतन्त्रको विपक्षमा भइरहेको पूर्वराजाको सक्रियताकाे शसक्त प्रतिवाद गर्नुपर्ने निष्कर्ष निकालेको छ।त्यसका लागि समाजवादी मोर्चामा रहेका दलसँग छलफल गरेर कार्यक्रम तय गर्ने तयारी गरेको छ । बैठकले ज्ञानेन्द्रलाई अघि सारेर राजावादीले व्यवस्थामाथि चुनौति दिन खोजेको ठहर गरेको पनि गरेकाे छ। त्यसका लागि माओवादीका शीर्षसहितका नेताले सोमबार नै समाजवादी मोर्चामा रहेका दलसँग छलफल गरिरहेका छन l