युरोपेली रक्सीमा २०० प्रतिशत भन्सार कर लगाउने ट्रम्पको चेतावनी

डोनाल्ड ट्रम्पले ईयू सदस्य मुलुकबाट आयात हुने रक्सी र स्याम्पेनमा २ सय प्रतिशत भन्सार महसुल लगाउने चेतावनी दिएका छन्। बिहीबार ट्रुथ सोसलमा लेख्दै उनले यस्तो बताएका हुन्। ईयूले अमेरिकी ह्विस्कीमा ५० प्रतिशत कर लगाएको बदलामा सो कदम चाल्ने ट्रम्पको भनाइ रहेको छ ।

ईयूले अमेरिकी ह्विस्कीमा लगाएको कर अप्रिल १ देखि लागू हुने छ। ट्रम्पले स्टिल र आलमुनियममा लगाएको २५ प्रतिशत भन्सारको बदलामा युरोपले ह्विस्कीमा कर लगाएको थियो।

ट्रम्पले सत्तामा आएदेखि नै व्यापार युद्ध गरिरहेका छन । उनले भन्सार महसुल बढाउँदा मुलुकमा रोजगारी बढ्ने दाबी गर्दै आएका छन्। जसलाई अधिकांश अर्थशास्त्रीहरूले खारेज गरिदिएका छन्।

ईयू, क्यानडा, मेक्सिको र चीनमा लगाइएको भन्सारका कारण अमेरिकी अर्थतन्त्र मन्दीमा जाने खतरा देखिएको छ। अमेरिकी सेयर बजारमा निरन्तर गिरावट जारी रहेको छ।

ह्वाइट हाउसले अहिलेसम्म लगानीकर्ताहरूको चिन्तालाई सम्बोधन गर्न आवश्यक ठानेको छैन।